Нашите тимови на едукатори веќе ги посетуваат училиштата ширум Републиката и им носат новости и насмевки на учениците.
Оваа година одлучивме да воведеме нови изненадувања за децата. Искуството од изминатите години не научи дека треба и ние да ги слушаме барањата на учениците, па така го збогативме проектот во многу аспекти.
Развивме нови надгледни средства за децата и ги подобривме досегашните, ги освеживме поклоните за секој ученик и многу повеќе.

Нови постери за секоја училница
Со секоја посета во едно училиште, децата добиваат едукативни постери кои практично го резимираат целото предавање и децата ќе можат да се потсетат на главните препораки од часот кога ќе посакаат.

Пакет изненадувања за секој ученик
Секој ученик и досега добиваше симболичен поклон. Оваа година, секој ученик ќе добие нов редизајниран распоред за часови, корисни и интересни материјали за во училиште, но и едукативна боенка за учење и забава дома. Едукативната боенка ќе ја следи приказната на Марко и Мила, главните ликови кои учат заедно со децата како да заштедат енергија во своите домови. Марко и Мила едно попладне ја посетуваат својата баба која не ја користи енергијата во својот дом разумно. Марко и Мила знаат каде таа греши, и и’ помагаат да ги поправи грешките.
Сите материјали за децата се развиени на македонски и албански јазик.

Секое дете на квиз
Досега, учениците кои посетиле настава на училишниот проект на EVN имаа можност преку лотарија да учествуваат на еден од двата полугодишни квизови во Скопје. Од оваа година, секое училиште ќе учествува на квиз, со тоа што ќе се организираат 3 регионални квизови секое полугодие и еден национален. Со ова им даваме можност на сите деца да го покажат своето знаење и се приближуваме поблиску до нив.

Штедиме во нашето училиште и соседство
При посетите во училиштата, на децата ќе им се даде можност да работат на мали проектни задачи на тема: Како да заштедам енергија во моето соседство/училиште?. Секое училиште може да оформи проектна група која ќе работи на својата идеја за заштеда на енергија. Најдобрите проекти на крајот на годината ќе бидат наградени и ќе има можност истите да се  имплементираат.

EVN Македонија своите напори за едукација на јавноста од областа на енергетската ефикасност и понатаму ги проширува. Оваа есен започнуваме со работилници за едукација на локални невладини организации за разумно користење на електричната енергија.
Училишниот проект, новите едукативни работилници се само дел од нашите заложби за подигање на свеста на нашите корисници за енергетската ефикасност.